SOMMARAKADEMIET 2025

Høgdepunkt frå Don Giovanni, 1. akt frå Valkyrien – og skogsscenen frå Hans og Grete er dei utvalde verka, pluss studentane sine eigne favorittariar. Nytt av året er at den svenske barytonen Peter Mattei, kjend m.a. for Don Giovanni-rolla på The Met i New York, kjem for å vere ein del av lærarteamet – i lag med Solveig Kringlebotn og Wagner-kjennaren Albert Dohmen.

Opera ved fjorden rettar seg mot unge songarar, orkestermusikarar, dirigentar og repetitørar over 18 år som er under utdanning, eller som nyleg er ferdigutdanna. Du som deltar får arbeide med dyktige pedagogar og musikarar - alle med erfaring frå store operahus eller symfoniorkester.

Velkomen til å søkje! Utlysingane med søknadsskjema til utfylling finn du i den internasjonale portalen Muvac (lenke).

TIDSROM 2025
21.-29. juni for songarar, dirigentar og repetitørar
24.-29. juni for orkestermusikarar

ALDERSGRENSE
18-35 år

STAD
Kurs- og konsertstad:
Oseana kunst- og kultursenter, sør for Bergen

Overnatting og måltid (inkludert i kursavgifta):
Veteranbåten M/S Sunnhordland, med kort gangavstand til Oseana.

KONSERTPROGRAMMET 2025
Torsdag 26. juni
Don Giovanni (høgdepunkt) av W.A. Mozart
Im Walde (2. Bild) frå Hans og Grete av Humperdinck
– pluss enkeltståande ariar

Søndag 29. juni
Valkyrien (Die Walküre), 1. akt av Richard Wagner
– pluss enkeltståande ariar

KORLEIS SØKJER DU

SØK HER (lenke til Muvac)

SØKNADSFRIST
8. desember 2024 

KURSAVGIFT
Songarar, orkestermusikarar, dirigentar og repetitørar: NOK 5000
Orkestermusikarar: NOK 2500

Kursavgifta dekkjer undervisning, overnatting og tre måltid per dag.

SØKNADSSKJEMA
Du skal fylle ut søknadsskjemaet for ditt fag/instrument på sida til Bergen Nasjonale Opera i den internasjonale portalen Muvac.com (direkte lenke)
Du finn alle dei ulike søknadsskjemaa oppført der, under "Vacancies”. For å kunne søkje, må du først opprette ein personleg profil på Muvac, om du ikkje har det frå før. Å opprette profil er gratis.

SØKNADSGEBYR
Merk at alle som søkjer må betale eit søknadsgebyr (application fee) på 26 EURO. Søknadsgebyret blir ikkje refundert.

OM VIDEO-OPPTAKA DINE
Merk at vi berre vil ha klikkbare og ikkje passord-beskytta lenker som fører direkte til ein video du har spelt inn, og deretter lasta opp på YouTube, Vimeo eller liknande. Du kan altså ikkje leggje ved video-filer som må lastast ned.

*** SONGARAR (14 plassar ) ***

Kursavgift for songarar: NOK 5000

Vårt akademi er unikt på den måten at songarane kan øve og opptre i lag med eit orkester i eit scenisk oppsett med regissør, og også framføre konsertariar. Den daglege coachinga blir sett inn i ein større samanheng enn berre det reint vokale.

Kvar songar får ei rolle i enten utdraga frå Don Giovanni av W.A. Mozart eller frå Hans og Grete av Humperdinck.

I tillegg kan sopranar søkje særskilt på rolla som Sieglinde, og herrestemmer søkje særskilt på rollene Hunding og Siegmund i Valkyrien av Wagner. Det er laga spesifikke utlysingar for kvar av desse tre rollene på Muvac. (Sjå også informasjon lenger nede i teksten her.)

I tillegg får kvar songar høve til å framføre ein enkeltståande favorittarie med akademiorkesteret.

I søknadsskjemaet skal du ha med CVen din, pluss lenker til videoopptak av to sjølvvalde ariar med deg sjølv – helst i ulike stilartar. Merk at vi berre vil ha klikkbare og ikkje passord-beskytta lenker.

I rubrikken “Questionnaire” på slutten av søknadsskjemaet skal du også føre opp tre ariar i ulike stilartar, som du kan tenkje deg å jobbe med og framføre på konsert. Ariane må ikkje vare lenger enn 5 minutt kvar. Om du får plass på akademiet, vil éin av desse tre ariane bli vald ut, slik at du kan synge den med orkesteret på ein av dei to konsertane på akademiet.

Eigen informasjon for dei som vil søkje spesielt på rolla som Sieglinde, Siegmund eller Hunding: I "Cover letter" som står på slutten av det spesifikke søknadskjemaet for kvar av desse rollene, kan du skrive om du berre er interessert i denne rolla, eller om du også vil søkje generelt som songar til sommarakademiet vårt: Og i tilfelle du også vil søkje generelt, treng du ikkje å sende inn to ulike søknadsskjema. Søknadsskjemaet for den spesifikke rolla er altså nok.

*** ORKESTERMUSIKARAR (33 plassar) ***

Kursavgift for orkestermusikarar: NOK 2500

I akademiorkesteret skal 33 unge orkestermusikarar spele saman med 8 profesjonelle, som også fungerer som gruppeleiarar og mentorar.

For akademiorkesteret 2025 har vi studentplassar til desse instrumenta:

fiolin
bratsj
cello
kontrabass
fløyte – 2. fløyte også piccolo
obo – 2. obo også engelsk horn
klarinett – 2. klarinett også bassklarinett
fagott
horn
trompet
trombone
basstrombone

I tillegg til tutti-prøvene blir det også gruppeprøver, der du saman med lærarane kan fordjupe deg i operamusikken.

For cellistar: Vi kan betale for transport av celloen din etter avtale.
For kontrabassistar: Vi kan låne deg eit instrument etter avtale.

I søknadsskjemaet skal du ha med CVen din, pluss lenker til videoopptak av eit sjølvvalt solostykke og 1-2 korte orkesterutdrag frå operalitteraturen. Merk at vi berre vil ha klikkbare og ikkje passord-beskytta lenker.

Du kan sjølv bestemme om du vil ha piano-akkompagnement eller ikkje på opptaket med det sjølvvalde solostykket ditt.

Her finn du repertoarlista vår med oversikt og PDFar med notane for kvart instrument med orkesterutdraga du skal velje frå. Merk: PDFen for ditt spesifikke instrument er også lagt inn som del av søknadsskjemaet på Muvac: https://bno.no/akademi-repertoar

*** DIRIGENTAR (4 plassar) ***

Kursavgift for dirigentar: NOK 5000

Som dirigentstudent får du jobbe tett med dirigentane frå den kunstnarlege leiinga på både song- og orkesterprøver, og du får tilbod om å dirigere eigne stykke på konsert.

I søknadsskjemaet skal du ha med CVen din, pluss lenker til 1-2 videoopptak med deg sjølv som dirigerer. Merk at vi berre vil ha klikkbare og ikkje passord-beskytta lenker.

*** REPETITØRAR (2 plassar) ***

Kursavgift for repetitørane: NOK 5000

Som repetitørstudent får du jobbe tett med dei to proffe vocal coach/repetitørane, og også med dirigentane på prøvene med songarane.

I søknadsskjemaet skal du ha med CVen din, pluss lenker til 1-3 videopptak. Eitt av musikkstykka må vere ein arie med ein songar og deg som akkompagnatør. I tillegg kan det vere eitt eller fleire valfrie solostykke for klaver. Merk at vi berre vil ha klikkbare og ikkje passord-beskytta lenker.

KUNSTNARLEG TEAM 2025
Kunstnarleg leiing: 
Eivind Gullberg Jensen, operasjef for Bergen Nasjonale Opera og sjefdirigent for Noord Nederlands Orkest 
Sascha Goetzel, kunstnarleg leiar for Orchestre National des Pays de la Loire og National Youth Orchestra of Canada, og første gjestedirigent for Sofia Filharmoniske Orkester 

Regiteam:
Ivar Tindberg, regissør, tekstforfattar, dramaturg og komponist 
Ann-Terese Aasen, regiassistent, koreograf og regissør

Vokalpedagogar: 
Solveig Kringlebotn, sopran og professor i song ved Operahøgskolen og Barratt Due Musikkinstitutt i Oslo 
Peter Mattei, baryton frå Sverige, m.a. kjend frå tittelrollene i Don Giovanni og Wozzeck ved The Met
Albert Dohmen, bass-baryton frå Tyskland, m.a. kjend for Ringen-rollene Wotan, Alberich og Hagen i Bayreuth
Kristin Okerlund, pianist og vocal coach frå Wiener Staatsoper 
Hans-Otto Ehrström, pianist og vocal coach frå Wiener Staatsoper

Orkesterpedagogar/gruppeleiarar:  
Stryk: 
1. fiolin: Maxim Brilinsky, gruppeleiar 1. fiolin, Wiener Philharmoniker 
2. fiolin:  Lucas Takeshi Stratmann, gruppeleiar 2. fiolin, Wiener Staatsoper
Bratsj: James Opie, alt. gruppeleiar bratsj, Kungliga Hovkapellet (Operan) i Stockholm 
Cello: Erik Wahlgren, solocellist i Kungliga Hovkapellet (Operan) i Stockholm
Kontrabass: Patrick Wilder, alt. solokontrabassist i Operaorkesteret, Den Norske Opera & Ballett 
Treblås: 
Karl-Heinz Schütz, solofløytist, Wiener Philharmoniker
Audun Halvorsen, solofagottist i DR Symfoniorkestret i København
Messing: Rune Brodahl, solohornist i Operaorkesteret, Den Norske Opera & Ballett

SPØRSMÅL? 
Har du spørsmål som gjeld søknaden til Sommarakademiet Opera ved fjorden? 
Ta kontakt med info@bno.no 

Sommarakademiet Opera ved fjorden blir arrangert av Bergen Nasjonale Opera i samarbeid med Oseana kunst- og kultursenter, og er støtta av Grieg Foundation, Sparebankstiftelsen DnB, Talent Norge, Vestland fylkeskommune, Sparebank1 SR-Bank og SR-stiftelsen og GC Rieber Fondene.

Fotokavalkaden er frå Sommarakademiet Opera ved fjorden 2021, 2022 og 2023: