Tre frå Wien-filharmonien til Sommarakademiet på Oseana

Er du ein av dei mange millionane som starta det nye året med å sjå nyttårskonserten med Wien-filharmonien på tv? I juni kjem tre musikarar frå dette renommerte orkesteret for å å vere lærarar på Sommarakademiet vårt "Opera ved fjorden" på Oseana.

Solofløytisten Karl-Heinz Schütz var den første frå Wien filharmoniske orkester som besøkte Bjørnafjorden i 2022 med den japanske gullfløyta si, både for å spele i lag med – og coache – dei unge studentane. Då det undervegs i akademiet vart behov for ein konsertmeister-vikar, kontakta Schütz sin gode kollega Maxim Brilinsky, som reiste frå Wien på kort varsel og leia orkesteret på begge konsertane på Oseana.

For 1. fiolinisten Brilinsky gav dette tydelegvis meirsmak, for deretter har han stilt som konsertmeister på Sommarakademiet kvart einaste år – og har også sagt ja i år. I fjor (2024) lokka han med seg ein tredje mann frå Wien, som også er den yngste gruppeleiaren: Lucas Takeshi Stratmann på 2. fiolin. Stratmann bestod i 2023 prøveperioden i orkesteret ved Wiener Staatoper. Dette gjer at han også kan spele i Wiener Philharmoniker, sjølv han offisielt enno ikkje er ein medlem av dette orkesteret.

Gyllen tråd mellom Wien og Vestlandet
Heilt frå starten av Sommarakademiet i 2021 har det vore ein gyllen tråd mellom Vestlandet og Wien, som er blitt sterkare år for år: Dirigenten Sascha Goetzel frå Austerrike er saman med operasjef Eivind Gullberg Jensen (som har studert direksjon i Wien) både grunnleggjar og kunstnarleg leiar for det unike sommarakademiet Opera ved fjorden.

33 studentplassar i årets orkester
I tillegg til trekløveret frå Wien-filharmonien, får dei 33 utvalde studentane i årets akademiorkester spele i lag med proffe musikarar frå framståande opera- og symfoniorkester frå ulike land i Norden. Lista over alle orkesterlærarane kan du sjå nederst.

Søknadsfrist: 2. februar 2025
Er du sjølv ein orkestermusikar i alderen 18-35 år som kan tenkje deg å vere med, minner vi om søknadsfristen 2. februar (Unntak: fløyte og klarinett.) På lenka under finn du alle detaljar om årets akademi, og om vilkåra for å kunne søkje. Men merk: søknadsfristen for songarar, dirigentar, repetitørar, fløytistar og klarinettistar gjekk ut 8. desember.

SOMMARAKADEMIET 2025

Under ser du oversikta over årets orkesterlærarar, som også fungerer som gruppeleiarar i akademiorkesteret. Og sjølv om dei tre frå Wien-filharmonien no held til i den austerrikske hovudstaden, kan vi nemne at 1. fiolinist Maxim Brilinsky opphaveleg er frå Lviv i Ukraina, og 2. fiolinist Lucas Takeshi Stratmann er oppvaksen i New York City.

Årets lærarar/gruppeleiarar i Akademiorkesteret 2025:

Stryk: 
1. fiolin: Maxim Brilinsky, gruppeleiar 1. fiolin, Wiener Philharmoniker 
2. fiolin:  Lucas Takeshi Stratmann, gruppeleiar 2. fiolin, Wiener Staatsoper 
Bratsj: James Opie, alt. gruppeleiar bratsj, Kungliga Hovkapellet (Operan) i Stockholm 
Cello: Erik Wahlgren, solocellist i Kungliga Hovkapellet (Operan) i Stockholm
Kontrabass: Patrick Wilder, alt. solokontrabassist i Operaorkesteret, Den Norske Opera & Ballett 
Treblås: 
Karl-Heinz Schütz, solofløytist Wiener Philharmoniker 
Audun Halvorsen, solofagottist i DR Symfoniorkestret i København  
Messing: Rune Brodahl, solohornist i Operaorkesteret, Den Norske Opera & Ballett
Pauker og slagverk:
Manuel Hofstätter*, paukist i Bergen Filharmoniske Orkester 

 *Hofstätter er gjestemusikar, og ikkje orkesterpedagog på akademiet

Denne artikkelen er oppdatert januar 2025

(Fotoet av Lucas Takeshi Stratmann: Fotograf Shaleah Feinstein)