ETTERSØKT: Wotan, Sarastro & Fafner (2024)
Vil du vere guden over alle guder på Sommarakademiet? Eller yppersteprest kombinert med jotne? Rollene som Wotan – og Sarastro & Fafner – blir no utlyst spesielt. // Søknadsskjemaet er no stengd //
Det var rekordhøgt søkjartal til Sommarakademiet Opera ved fjorden denne gongen, og juryen er no i ferd med å avslutte arbeidet, slik at årets studentar kan inviterast. Men vi jaktar framleis på to mørke mannsstemmer: Den eine (bass-baryton) skal få synge rolla som guden Wotan i Rhingullet. Den andre (bass) skal få tolke både Sarastro i Tryllefløyten, og Fafner i Rhingullet.
Kvart av utdraga frå desse to operaene varer rundt éin time, og blir innstudert og framført på to ulike konsertar i regi av Ivar Tindberg, i akademiperioden 22.- 30. juni 2024.
Rhingullet (Das Rheingold) er starten på den store Ringen-syklusen av Richard Wagner, og karakteren Wotan er bygd på den norrøne guden Odin. Wotan tørstar både etter gull, makt og kjærleik – og slikt blir det sjølvsagt drama av! Fafner er ein av dei to kjempene (jotnane) i Rhingullet, medan Sarastro er sjølvaste ypperstepresten som går heilt ned til djup F2 i Tryllefløyten av W. A. Mozart, der han måler krefter med Nattens dronning.
I tillegg til rolla som Wotan – eller Sarastro & Fafner – vil dei to utvalde songane få sjansen til å synge ein sjølvvald arie saman med akademiorkesteret på ein av konsertane.
Albert Dohmen som coach
Nykomar i songlærar-teamet sommaren 2024 er den tyske bass-barytonen Albert Dohmen (lenke til biografi) som sjølv er ein erfaren og markant Wagner-tolkar: Dohmen husdebuterte ved Bayreuth-festivalen i 2007 som Wotan/Der Wanderer i Ringen, i ein produksjon som også vart vist dei komande åra. Seinare har han også sunge rollene som Alberich og Hagen same stad.
FOTOET:
Albert Dohmen i rolla som guden Wotan på Bayreuth-festivalen. © Bayreuther Festspiele/Enrico Nawrath.
Søknadsfrist: 8. mars 2024 // Søknadsskjemaet er no stengd //
Søknadsskjema og detaljert informasjon finn du på den internasjonale søknadsportalen Muvac. Merk at søknadsfristen for dei andre studentplassene ved Sommarakademiet gjekk ut i januar, men at desse konkrete utlysingane for rollene som Sarastro & Fafner – og Wotan – har søknadsfrist 8. mars:
Denne artikkelen er oppdatert etter at søknadsfristen gjekk ut.
Her kan du lese om Sommarakademiet Opera ved fjorden generelt.
