Hopp til innhold

Kva skjer i Gianni Schicchi?

Ein diger arv, eit forelska par – og ein djevelsk smart Gianni Schicchi. Her er handlinga i den komiske einaktaren som våre akademistar skal få bryne seg på sommaren 2022.

Tid og stad:
I originalhistoria er vi i Firenze i året 1299. Teksten av Giovacchino Forzano er bygd på eit utdrag frå Den guddommelege komedie av Dante. Puccinis opera hadde urpremiere som ein del av trilogien Il trittico på Metropolitan Opera i New York desember 1918.

Handlinga:
Aristokraten Buoso Donati døyr. Men når dei griske slektningane finn testamentet hans, oppdagar dei forferda at heile arven skal gå til eit kloster. Dei prøver desperat å finne ei løysing for å få kloa i verdiane likevel, og den unge Rinuccio foreslår å hente den oppfinnsame outsideren Gianni Schicchi. Rinuccio er kjærast med Schicchis dotter Lauretta, noko Donati-familien mislikar sterkt, fordi ho ikkje er rik nok.

Når Gianni Schicchi kjem til den avdødes hus i lag med Lauretta, blir han ikkje særleg godt motteken av slektningane til Donati. Schicchi blir fornærma, men Lauretta får han mildare stemt igjen, og syng den både såre og smektande arien “O mio babbino caro”:

Det er nok mange som ikkje veit at denne opera-perla kjem frå nettopp Gianni Schicchi, og ein del trur også at det er ein voggesong. Men dottera Lauretta syng til sin “kjære, vesle pappa”, der ho tryglar han om å få lov til å gifte seg med Rinuccio, elles ynskjer ho ikkje å leve lenger.

Her frå The Royal Opera House i London, med Ekaterina Siurina som den forelska Lauretta (teksta på engelsk):

Gianni Schicchi lanserer no ein slu idé: Sidan ingen andre enn slektningane veit at Buoso Donati er død, kan Schicchi sjølv late som han er Donati, og diktere eit nytt testamente til notaren. Samtidig minner han alle om at dokumentforfalsking er eit alvorleg brotsverk, med ei straff som svir. Men slektningane fantaserer no ivrig om korleis dei kan fordele dei ulike eigedommane mellom seg: Spesielt huset, møllene og muldyret har alle lyst på - og kvar for seg prøver dei å sjarmere og manipulere Schicchi for å sikre seg den beste delen av arven.

Notaren kjem for å skrive det nye testamentet for den “døyande” Donati i senga, alias Gianni Schicchi. Og alt er vel og bra, heilt til dei forskrekka slektningane høyrer – utan å våge å gripe inn – korleis Schicchi dikterer kven som skal arve både huset, møllene og det beste muldyret i heile Toscana: Det er sjølvsagt gamle Donatis “trufaste venn”: Gianni Schicchi!

Persongalleriet i Gianni Schicchi:
Gianni Schicchi (baryton) - Mikael Horned
Lauretta (sopran) - dottera hans – Annika Beinnes

Slektningane til Buoso Donati:
Zita (mezzosopran) - kusina til Buoso – Christina Jønsi
Rinuccio (tenor) - Zitas nevø, og kjærasten til Lauretta – Markus Bjørlykke
Gherardo (tenor) - nevøen til Buoso – Ian Marcus Bjørsvik
Nella (sopran) - kona til Gherardo – Eva Langeland Gjerde
Gherardino (mezzosopran) - sonen til Gherardo og Nella – Wilma Kvamme
Betto di Signa (bass) - svogeren til Buoso – Slava Graborsky
Simone (bass) - fetteren til Buoso – Jacob Abel
Marco (baryton) - sonen til Simone – Stian Jebsen
La Ciesca (sopran) - kona til Marco – Mathilda Bryngelsson

Maestro Spinelloccio (bass) - lege – Johannes Sejerstad Bødtker
Ser Amantio di Nicolao (bass) - notar – Johannes Sejerstad Bødtker

KJØP BILLETTER HER

Siste nyheter

Stilling ledig S Foto fra Flaggermusen av Magnus Skrede

Ledig stilling: Direktør

Bergen Nasjonale Opera søker etter direktør i fast 100 % stilling fra høsten 2024. Søknadsfrist 17. juni.

OVF23 Akademiorkesteret

«Verdensmestere» til Os

Sommerakademiet Opera ved fjorden har et stjernelag, som både studentene og publikum får nyte godt av.

Henning Larsen Grieg Hallen Grieghallen Round2 Copyrights by KVANT 1

Slik vil Griegkvartalet se ut

- Med vinnerprosjektet Kontrapunkt vil Griegkvartalet fremstå med en arkitektonisk utforming og funksjonalitet, som vil vitalisere Bergen og tilføre byen noe helt nytt, forteller juryleder Anne-Grete Strøm-Erichsen.

Sangere Tryllefloyten collage web

Kva skjer i Tryllefløyten på Oseana?

Skal du vere med på torsdagskonserten 27. juni? Først kan du bli betre kjend med fuglefangaren Papageno og dei andre rollene i denne kompakte versjonen av Mozarts opera.