ETTERSØKT: Il Commendatore
Vil du spele rolla som gjenferd, og med myndig røyst skremme din eigen mordar? Vi søkjer no ein bass som kan fylle rolla som Il Commendatore i operaen Don Giovanni under sommarakademiet vårt i juni.
SØKNADSFRIST: 23. FEBRUAR / søknadsskjemaet er no stengt /
Ein av dei tre operaene årets akademistar skal jobbe med under Sommarakademiet Opera ved fjorden 21.-29. juni er Don Giovanni av Mozart. I det rundt timelange utdraget frå denne både humoristiske og dramatiske operaen, skal vi følgje dei siste dagane til den kyniske kvinneforføraren Don Giovanni.
Søkjer bass i aldersgruppa 18-35 år
Søknadsfristen for dei andre rollene gjekk ut i desember, men no søkjer Bergen Nasjonale Opera spesifikt etter ein bass i alderen 18-35 år som kan tolke rolla som Il Commendatore. I tillegg til å vere ein av solistane i Don Giovanni, får også songaren opptre med ein sjølvvald arie.
Legendariske scener
Kommandanten er faren til Donna Anna, og blir myrda av Don Giovanni i 1. akt, men dukkar deretter opp som gjenferd i 2. akt, for å sende syndaren Don Giovanni rett til helvete. Har du sett spelefilmen Amadeus hugsar du nok dei legendariske banke-tonane når gravstatuen av Il Commendatore riv ned muren og står opp frå dei døde – og med myndig røyst kallar på Don Giovanni. Filmen viser også parallellane mellom Mozarts eigen avdøde far Leopold og den strenge Kommandanten.
Peter Mattei gjestar akademiet for første gong
I dette klippet frå The Metropolitan Opera i New York kan du sjå scenen der gjenferdet av Il Commendatore (her: bassen Alexander Tsymbalyuk) viser seg for Don Giovanni og tenaren hans Leporello. Og merk: Den svenske barytonen Peter Mattei, som her tolkar Don Giovanni – skal i år for første gong vere lærar på sommarakademiet vårt, saman med mellom andre Solveig Kringlebotn og den tyske Wagner-songaren Albert Dohmen:
Søknadsfrist for rolla som Il Commendatore: 23. februar 2025 / søknadsskjemaet er no stengt /
Søknadsskjema finn du på den internasjonale søknadsportalen Muvac (lenke). Merk at søknadsfristen for dei andre songarane ved Sommarakademiet gjekk ut i desember. Søknadsfristen for alle orkesterinstrument (bortsett frå fløyte og klarinett) er 2. februar.
Her kan du finne all informasjon samla om Sommarakademiet Opera ved fjorden 2025 (lenke).
FOTOET: Bassen Clive Bayley som Kommandanten tilbake i 2015, då Bergen Nasjonale Opera sette opp operaen Don Giovanni i Grieghallen. (Fotograf: Magnus Skrede)
